Ernst Frieböse: Dem Darpschmett sine Red

Dem Darpschmett sine Red

De Darpschmett wär, wie sich dat so jeheert,
een Kehrl, so stoak on iesern wie een Peerd.
He kunn, ganz ohne omtofleeje,
moardsstoarke Ieserstange kromm verbeeje.
Dat doarbie wäre sine Oarms so oppjebläht,
datt manchmoal goar sin Hemd terrät.
Wenn oawer eener kiggd on sich verseehrd,
dann säd he bloß:
"Doar send all dollre Dinger en de Welt passert!"

On wat en andrer ut dem Darp uck emmer säd,
am Eng von jede Sach, doar wär dat siene Red.
Moal kreech he eent jewescht von eenem boß'jen Peerd,
he oawer säd:
"Doar send all dollre Dinger en de Welt passert!"

Als he een ander Moal groad met de Frät
en eene Kohfload rennjeschmeert,
brommd he terknerscht:
"Doar send all dollre Dinger en de Welt passert!"

Als sine Frun ehm tweemoal hingernander
Twillinge beschert,
säd he man bloß:
"Doar send all dollre Dinger en de Welt passert!"
Ganz jlick, wat uck passert em Huus on en de Schmäd,
von freeh bet spoad wär dat dem Darpschmeet
sine Red.

On uck, als all ganz wacklich wär sin Kopp,
heerd he met disse Red nich opp.
On wie't so jeiht, met eenmoal kam de Dod,
dem Schmett sin Wief, dat jriend en Angst en Not
He oawer meend: "Hiel nich!
Begroaw mi, wie sich dat jeheert,
"Doar send all dollre Dinger en de Welt passert!"