Ernst Frieböse: Wat eck so jeern erläwe mecht!

Wat eck so jeern erläwe mecht!

Eck weet nich, wie dat steiht on jeiht,
Tomeist man nuscht erläwe deid.

De Tiet, de rollt on rollt on rennt,
On onsereent, dat licht on pennt.

On doarbie deid et soväl Scheenet jäwe;
Man mißd doch eijentlich väl mehr erläwe.

Em Stelle läj eck manchmoal mi torecht,
Wat eck so jeern erläwe mecht! -

Tom Biespeel mecht erläwe eck dem Spott,
Wenn een Jerichtsvollsträcker bie sich sälwer fände mott.

Jeern mecht uck weete eck, wenn man de Notbrems träcke deid,
Wie lang det duert, bet so'n D-Zuch steiht.

On äwerhaupt, ob dat es woahr,
Dat sowat kostet hundert Jille boar. -

Am leewste mecht eck moal erläwe,
wat dat woll fär een Bumms mecht jäwe,

Wenn moal een Stiemer met Jewalt
En voller Foahrt an eene Breck ranknallt;

Wie det woll krache werd on bloake,
Wenn keener nich dran dachd , dem Schornsteen läj to moake! -

Doch gleew ek, dat et bäter weer,
Wenn eck nich sälwer boawe weer! -

Dat Scheenste oawer, wat eck denke kann,
Weer doch, wenn so von Zoppot moal een Mann

Foahrt opp de "Hansestadt" en't weide Meer,
On sine Ollsche heild nu sehr.

Se steiht am Seestäch on deid wenke,
Deid met'm Schnodderkodder schwenke,

On wenn dann de Sirene roare,
Doar merkt se goarnich, datt he all deid foahre.

Se winkt on rennt, datt's dorch de Plankes zettert,
on Plumps! - schon es se en de Ostsee renjeschmettert!!!

Verdammt, dat weer joa vleicht een Wetz
En Zoppot an de Seestächspetz! -

So jefft et väl noch, wat nich schlecht,
Wann man dat moal erläwe mecht!